Home » Curiosità » Angelon

Angelon

CuriositàLeggende

Angelone“Angelon”
di Danilo Montin

Tanti ani fa, so’na fameja nela zona de Sinto Euganeo, xe nato on putin che pesava 6 chili e i ghe ga messo nome Angelo. Angelo el continuava a crescere a dismisura, a 10 ani el jera za aumentà de altri 50 chili, el so unico problema el jera magnare, el gavèa sempre tanta fame. Nel’età adulta el xe deventà enorme, al posto de Angelo el xe sta ciamà Angelon. Come lavoro el fasèa e contadin, tuti lavori pesanti, alsava anca grossi pieroni. Con la vecchiaia el’andava a elemosinare, parlava poco, e bateva co on pugno le porte dele case e po spetava che qualcun ghe desse calcossa. On tempo ai putìni i ghe disèa “se te si cativo ariva l’orco!” Ma quando ‘sti putini anca quando che i jera boni incontrava Angelon i ciapava paura, i scapava via rabiosi par n’altra strada. El gavèa on aspeto inumano! Sembrava l’orco dele fiabe!

El gera molto alto, co on panson voluminoso, co ‘na facia che sembrava schicià, e naso e jera largo fato a triangolo, coi oci porcini mezi sarà, sora de questi el gavèa dele folte sopracigie, piè e man grandi, recie a sventola piene de pelo, el portava la barba e i cavéj rebufà. Al so passajo, prima se sentiva la spussa e dopo se vedeva ‘rivare l’omo compagnà da el so odore. De caratere el jera bonacion, par questo la gente ghe dava volentiera robe da magnare e da bèvare. Angelon co che la fame aretrata che’l gavèa, e magnava qualsiasi roba, ‘na volta par scherso so on piato de spagheti co le sardele i ghe ga messo on filo de spago, lu no se ga gnanca acorto e el ga magnà tuto, dopo ghe xe vegnù ‘na sen rabiosa, el ga bevesto vin in quantità da fare ‘na gran bala e el xe andà a casa de strambalon. No el jera pì bon de stare in piè, ogni tanto el se tacava a qualche cancelata, e sonava el campanelo, opure el bateva la porta de qualcun, grugnendo e co le bave ala boca, el se fasea indicare la strada giusta per andare a casa sua. A jera de sera e la gente che no lo conosìa i ciapàva ‘na paura boia che ghe vegnèa i sgrisoloni da batere i denti. In seguito ghe xe vegnù forti dolori, par eliminare quelo che el gavèa magnà, compreso el spago, i ga dovesto fare la lavanda gastrica 

A che’l tempo i disea che so i Coli Euganei ghe vivesse i tassi: naturalmente ghe jera qualcun che ghe credèa. Dei zòvani i ga convinto Angelon de ciapàre on tasso, el gavarìa guadagnà tanti schei dal ricavato dela pelicia. Per riuscire a ciapàrlo i tosi i ghe dise de andare co el scuro, e de scòndarse con on saco verto nel pendìo del monte Vendevoo. Angelone tute le sere el’andava ne pendìo del monte, el restava la par diverse ore co el saco verto ma sensa riuscire a ciapàre gnente. ‘Na sera i soiti tosati da lontan i lo segue, dal’alto ‘na piera bela tonda, la vien fata rodolare zo in maniera che la ghe arivasse dentro al saco. El nostro amigo el xe sta svelto a insacarla, a sarare ben el saco e tuto sodisfato credendolo on tasso e xe’ndà verso casa, portando el saco in spala. Finalmente dopo essere arivà a casa, stanco morto, co i ossi tuti roti, vedendo la piera el ga esclamà: “So sta istrigà, el tasso se gà trasformà in na pria!”